Познатиот гинеколог и експерт по асистирана репродукција, д-р Слободан Боби Лазаревски во новото издание на „Астрорум“ зборува за својата работа, за велосипедизмот, колекционерството на плочи, литературата и културата. Во разговорот разоткрива некои поинакви сегменти од животниот и професионалниот пат. Неговата работна биографија е фасцинантна, а доволно е да споменеме дека неговата стручност досега има резултирано со бројка на новородени бебиња од епрувета колку еден цел град во Македонија.

Д-р Слободан Лазаревски дипломирал во 1984 година на Медицинскиот факултет во Скопје, потоа на истиот и специјализирал гинекологија и акушерство, а неговата супспецијалност е брачната неплодност. Подоцна тој се доусовршувал во доменот на асистираната репродукција во Софија и Љубљана. Лазаревски само една година по дипломирањето се вработува во Гинеколошко- акушерска клиника на Универзитетскиот клинички центар – Скопје, а во 1995 храбро решава да премине во приватната пракса. После пет години, заедно со уште неколку негови колеги успева да најде инвеститор за реализација на својот професионален сон и станува еден од основачите на Одделот за гинекологија и акушерство во приватната болница „Мала Богородица – Систина“. Од 2010 година тој е дел од тимот на клиничката болница „Аџибадем Систина“ и е раководител на Одделот за асистирана репродукција со кој е лидер по успешност во регионот, но и пошироко. Тој е национален координатор во ИВФ секторот, претставник на Македонија во Конзорциум на (ESHRE) за ИВФ мониторинг, и е член на сите релевантни светски асоцијации од областа, како ESHRE – Европска асоцијација за асистирана репродукција и ендокринологија и ASRM – Американско здружение за асистирана репродукција. Доктор Слободан Лазаревски важи за еден од најголемите експерти во светот од доменот на хуманата репродукција.