Го одбележуваме Денот на љубителите на книгата

Читањето книга е сонување со отворени очи

На денешен ден (9 август) се прославува Интернационалниот ден на љубителите на книгата. Ќе се согласите дека за вистинските библиофили секогаш е погодно време за добра книга и не чекаат посебни празници и јубилеи. Но, овој датум се одбележува со цел да се потсетиме на убавината на литературата и на читањето. Како и зошто ги засакавте книгите?

Како што има безброј одговори на ова прашање, така има и многу теории за потеклото на овој празник. Не е познат конкретниот иницијатор, повод и година кога почнал да се одбележува Денот на љубителите на книгата, но се знае дека оваа традиција најмногу се проширила во САД. Таму на 9 август секоја година се одбележува Националниот ден на љубителите на книгата. Оваа убава пракса ја прифатиле и останатите земји, и така, овој датум станал неформален ден на сите љубители на читањето.

Овој ден се одбележува во библиотеките и книжарниците, со специјални настани, средби со авторите и распродажби. Овој празник е добар потсетник дека може, барем еден ден, да ги исклучиме паметните телефони и социјалните мрежи, и целото внимание да ѝ го посветиме на книгата.