По повод гостувањето на Мулату Астатке во Скопје во рамките на Off Fest, Арс Либрис ја промовира биографијата „Мулату Астатке: Како се создава етио-џез“.

Мулату Астатке е таткото на етио-џезот. Тој е еден од најзначајните синови на културата на Етиопија и воедно еден од најуспешните џез-музичари на светот. Астатке бил првиот музичар од Етиопија школуван во странство (Лондон, Њујорк и Бостон) и првиот африкански студент примен на престижниот музички колеџ „Беркли“, кој во 2012 година го наградува со почесната титула Доктор по музика.

Како водач на неколку групи, тој свири вибрафон и конги – инструменти што ги пренел во етиопската популарна музика, заедно со други ударни инструменти, клавијатури и органа. Поширока слава меѓу западната публика доживува во 2005 година, кога се појавува како автор на седум композиции од саундтракот за филмот “Broken Flowers” на Џим Џармуш.

Книгата „Мулату Астатке: Како се создава етио-џез“ претставува осврт на животот и музиката на овој 70-годишен музички иноватор, композитор, аранжер, инструменталист, радиопрезентер, сопственик на клуб и семеен човек, кој и ден-денес живее и работи во Адис Абеба, со ист жар и со иста живост како и во неговата младост. Книгата е дел од проектот на Универзитетот на Етиопија, во соработка со Зома центарот за современа уметност.

Во текот на Off Fest, книгата ќе биде достапна по цена од 150 денари.