Со цел да се одбележи завршувањето на оваа необична година, издавачката куќа „Арс Ламина“, заедно со книжарниците „Литература.мк“, на 25 декември ќе организираат онлајн новогодишен настан. Новогодишната забава што двете компании, традиционално секоја година, ја организираат за своите вработени, автори, соработници и пријатели, овој пат ќе се „одржи“ во вид на онлајн-дружење на фејсбук-профилите на организаторите, следејќи ги правилата за безбедност.

Во рамките на настанот ќе се одржи и промоција на новиот албум на гитарскиот виртуоз и наш пријател, Влатко Стефановски, а ќе биде премиерно прикажан и видеоспотот за песната „Огледало“. Албумот „Тафталиџе шафл“ („Taftalidze shuffle“) на Стефановски, во издание на „Кроациа рекордс“ (Croatia Records), наскоро ќе биде достапен во книжарниците „Литература.мк“.

Настанот ќе опфати и музички настап на македонската група „Фанк шуи“ (Funk Shui), позната по својот уникатен музички израз кој комбинира повеќе различни ритмови и алтернативни инструментални музички жанрови. Ќе бидат споделени и кратки видеоразговори со дел од авторите на „Арс Ламина“ и пријатели на двете компании, кои ја обликуваа книжевната сцена оваа 2020 година. Меѓу нив се и Неле Карајлиќ, Славимир Футро, Васко Тодоров, Јана Мишо, Моџо Килингтон и Давор Панчевски. Модератор на настанот ќе биде водителот Марко Марк.

Сите заинтересирани во петок ќе можат да го проследат настанот на фејсбук-профилите на „Арс Ламина“ и „Литература.мк“, како и на каналот Литература.мк на „Јутјуб“, со почеток од 21 часот.

Ве покануваме да ни се придружите во петок во 21 часот. Да свртиме нова страница и да ја почнеме 2021 година со добра музика, добра книга, во добро друштво и со многу љубов!