Повеќе од 150 крупни и брадести мажи се собраа на натпреварот во Кивест на Флорида, каде што по повод роденденот на писателот Ернест Хемингвеј, традиционално се избира неговиот двојник

Секое лето во Кивест е резервирано за годишното натпреварување во барот „Слопи Џос“, место што Хемингвеј често го посетувал во текот на триесеттите години на минатиот век, додека живеел на Флорида.

Фестивалот „Денови на Ернест Хемингвеј“ ја слави силата, стилот и литературното наследство на познатиот писател, а натпреварот за двојник на Хемингвеј ги обединува средовечните мажи кои облечени во спортска облека каква што носел Хемингвеј се обидуваат да ја освојат титулата „папа“ Хемингвеј.

Оваа година, по седум последователни обиди, тоа му успеа на белобрадиот Тексашанец Ричард Филип (71).

„Ернест Хемингвеј го чувствувам како да ми е брат од различна мајка. И јас сум риболовец, ловец, пијам многу… понекогаш помалку, па потоа малку повеќе…“, изјави пензионираниот продавач на недвижнини.

Победникот на овој натпревар го одбира жири-комисија составена од поранешни победници-двојници.

Инаку, фестивалот „Денови на Ернест Хемингвеј“ е составен од литературни читања, тридневен натпревар за избор на двојник на Хемингвеј и комеморација и одбележување на 118-тиот роденден на Нобеловецот и добитникот на Пулицеровата награда.