Книжарницата „Литература.мк“ од интернет се пресели на улицата „Македонија“

Вчеравечер (сабота, 15 октомври), во строгиот центар на Скопје, на најфреквентната пешачка артерија, се отвори ново место што ќе ги обединува сите фини нешта. Станува збор за нова, ексклузивна книжарница „Литература.мк“, која од интернет сега се пресели на улицата „Македонија“, бр. 21 (спроти спомен-куќата на Мајка Тереза).

Слободан Голубовски и Дарко Фиданоски ја пресекоа црвената панделка со што означија почеток на работа на книжарницата Literatura.mk

Слободан Голубовски и Дарко Фиданоски ја пресекоа црвената панделка со што означија почеток на работа на книжарницата Literatura.mk

Литература.мк“ постои на интернет веќе пет години, а сега ја отвора и својата прва „физичка“ продавница. Во простор од 80 m2, со врвно ентериерно уредување, книжарницата „Литература.мк“ ќе ги донесе светските книжарски трендови во Скопје и изданијата на најголемите домашни издавачки куќи, задоволувајќи го вкусот и на најпребирливите вљубеници во книгата.

Како веќе препознатливо место за страсните љубители на книгата, вљубеници во пишаниот збор и талкачи низ бескрајниот литературен простор, „Литература.мк“ ќе понуди богата програма, разни случувања и содржини секој ден, наменети за сите возрасти и за сите вкусови: литературни и музички дружења, гостувања на домашни и на странски автори, креативни средби и едукативни работилници за најмалите читатели итн.

_j0a5677

„Нашата визија беше книжарница каква што вистински ù прилега на улицата ’Македонија‘, ’најважната улица‘ во Скопје што отсекогаш била симбол за престиж. Улицата ’Македонија‘ е колепката на македонското граѓанство и отсекогаш била средиштето на напредокот и на новата мисла, центар на интелектуалниот, трговскиот, па и на ноќниот живот на градот“, вели Дарко Фиданоски, еден од сопствениците на книжарницата „Литература.мк“. „Сакаме ’Литература.мк‘ да го врати тој сјај и живот на улицата ’Македонија‘, да биде сврталиште на љубителите на книгата, на случајните минувачи, на уметниците, бизнисмените, на студентите, пензионерите, на намерниците кои тргнале во саботен шопинг, на љубителите на добро кафе и добра музика“, додава Фиданоски.

_j0a5882-2

Официјалното отворање на книжарницата „Литература.мк“ на улицата „Македонија“ се случи вчеравечер со забава на отворено, а веќе од понеделник почнува со најавената програма и со предвидените содржини.

„Литература.мк“ претендира да прерасне во вистинска „книжарница на Македонија“, почнувајќи од улицата „Македонија“, епицентарот на метрополата, и ширејќи ја својата мрежа низ целата земја.

 

This slideshow requires JavaScript.

Advertisements

One thought on “Книжарницата „Литература.мк“ од интернет се пресели на улицата „Македонија“

  1. Пингување: Видеорепортажа од отворањето на книжарницата „Литература.мк“ | Literatura.mk

Коментарите се затворени.